Heftige kvardagsfjell

Året er 2003, og ryktet om eit segnomsust pudderparadis på Voss må sjekkast ut. Den erfarne fjellguiden og toppturentusiasten Stein Falsen Møller pakkar raskt saman feller og skiutstyr og køyrer dei bratte svingane frå Bergen til Voss.

– Alt som var her den gongen var eit knøttlite skitrekk. Eg tok det eit stykke opp i terrenget, og begynte å gå i den uberørte laussnøen

Oppover i fjellsida, utanfor løypene, seier Stein som vart frelst frå fyrste stavtak. Sidan har han fortsett å koma hit. Enten privat, for å trena eller i jobben som skredinstruktør og guide.

Hyttedraumen

No er det sønene Eirik (9), Sondre (5) og Iver (2) som snart suser nedover løypene i leik og moro, slik pappa har gjort i årevis. Det er i alle fall håpet.

Saman med sambuar Ane har han kjøpt hyttetomt i Hagamyra og flytta inn i den nye hytta i desember 2022. – Me kosar oss og har funne oss godt til rette, seier han.

Stein sine 5 beste skitips:

1. Bruk tid på å jobba med skiteknikk i slalåmbakken. Det får du igjen for på toppturar og frikøyring i variable snøforhold. Ein dag med skilærar kan vera ei god investering. Bestill skiundervisning her.
   
2. Skaff deg kunnskap om skredfarevurdering og kameratredning før du startar med toppturar. Ta gjerne eit skredkurs.
   
3. Ha alltid med vindsekk og ei varm jakke på ski utanfor løypene og på topptur. Det er utstyr som reddar liv om du skulle vera uheldig.
   
4. Sørg alltid for å ha nok straum til mobiltelefonen ute på tur. Det er eit særs viktig hjelpemiddel viss du treng hjelp.
   
5. Viktigast av alt: Ta ein tur til Myrkdalen etter snøfall! Det kjem du ikkje til å angra på!

Paret gler seg til å skapa minner her, saman med familien. Invitera venner. Kosa seg på kjøkkenet. Laga mat saman. Sjå ut på kvite fjelltoppar gjennom store vindaugsflater.

Hang til bratte heng

Paret ynskjer at Myrkdalen skal bli deira «nærfjell».

– Me vil tilbringa helgene ein stad me er sikra snø. Ein stad me kan dra til utan lange bilturar og mykje styr før me kjem oss av garde. Med dei klimaendringane me har no, der alt ser ut til å bli mildare og våtare, vurderer me Myrkdalen som den mest snøsikre staden innanfor to timars avstand heimanfrå i Bergensområdet, seier Stein.

Han elska barndomens uteliv i granskogen i Krokstadelva utanfor Drammen, men no kan han ikkje tenkja seg noko betre enn bratte vestlandsfjell. Han kallar seg topografi-flyktning.

Det var fyrst i militæret på Setermoen i Bardufoss at Stein blei introdusert for fjellski og klatring. Og sidan har han alltid vore på jakt etter brattheng og urørt snø. Etter geologiutdanning og 12 år som fagansvarleg for redning i Aak Safety, jobbar han no som redningsteknisk rådgjevar i Norsk Luftambulanse.

Klart for skiglede

Som leiar for ei alpin redningsgruppe på fritida og sertifisert tinderettleiar er nærleik til fjellet noko han har ønska seg lenge. Førebels ser han for seg at familien vil boltra seg mest i skianlegget . Borna skal få skiferdigheitene på plass før pappa tek dei med på frikøyring og toppturar.

– Gleda over å vera ute betyr mykje for Ane og meg. Det ynskjer me å bringa vidare til barna. Kanskje opplever dei den same skigleda som oss? Ved å kjøpe hytte her legg me i alle fall til rette for at dei kan gripa den sjansen. Så får me berre håpa at dei kastar seg ut i det, bokstaveleg tala!